Guddiga Joogta ee Barlamaanka Federaalka Oo Ka Dooday Shaqooyinka Horyaala

Posted Date: 13 Sep 2018   in: news,Puntland,Somalia     0 Comments

Kulan ay yeesheen Guddiga joogtada ee Golaha barlamaanka, uuna shir guddoominayay Guddoomiye ku-xiggeenka koowaad C/weli Sheekh Ibraahim Muudeey, goobjoogna ay ka ahaayeen guddoomiye ku-xiggeenka labaad ee mudane Mahad Cabdalla Cawad iyo xoghayaha guud ee golaha shacabka Mudane C/kariin Xaaji Cabdi Buux ayaa looga dooday shaqooyinka iyo jadwalka barlamaanka federaalka oo uu u furmay kalfadhigoodii 4aad.

Kulanka intiisa badan ayaa waxaa looga hadlay shaqooyinkii horyaalla golaha shacabka iyo siddii loo hormarin lahaa, waxaana Xubnaha guddiga ay soo bandhigeen talooyinkooda ku aadan sida loo wajahi karo howlaha culus ee horyaalla Golaha Shacabka iyo kala hormarintooda.

Xubnaha guddiga joogtada ah ayaa isku raacay in si dardar leh loo shaqeeyo, maadaama waqtiga uu yar yahay shaqadana ay badan tahay.

Sidoo kale waxay ka doodeen sida loo kala hormarin karo shuruucda hadda hortaalla Golaha Shacabka, kuwaasi oo heerar kala duwan maraya sida hindise sharciyeedayada Xukuumadda ay soo gudbisay oo aan weli golaha shacabka la horgeyn iyo hindise sharciyeedyo maray akhrinta koowaad iyo labaad.

Guddoomiye ku-xiggeenka koowaad ee Golaha Shacabka mudane C/weli Sheekh Ibraahim Muudeey ayaa sheegay in kalfadhigaan shaqooyin badan la doonayo in la qabto, isaggoo Xildhibaanada kula dardaarmay inay usoo diyaar garoobaan gudashada masuuliyada saaran.

“Mudanayaal waad ogtihiin howlo badan ayaa na horyaalla kalfadhigaan oo ay ugu horeeyaan miisaaniyadda, anisxinta hindise sharciyeedyada muhiimka u ah dalka iyo dib u eegista dastuurka”. ayuu yiri guddoomiye Muudeey.

Ugu dambeyn kulanka ayaa waxa lagu soo bandhigay Jadwalka uu Golaha Shacabka ku shaqeyn doono kalfadhiga 4-aad.

Leave a Reply

Your email address will not be published. Required fields are marked *

Allidamaale